Dijòus 20 de decembre a 18h30 : Reconstre dins l’encastre dels Dimecres Universitaris Occitans e Catalans organizats per la Seccion d’Occitan e la Seccion de Catalan de l’Universitat Tolosa—Joan Jaurés amb lo sosten dels laboratòris de recèrca PLH, CLLE e LLA-Creatis e la Region Occitània/Pirenèus-Mediterranèa.

Danís Chapduelh es un engenhaire, promotor e actor cultural, especialista de lenga e cultura occitanas. A l’ora d’ara es cap redactor del magazine cultural en occitan Lo Diari e cargat de
mission per l’Institut d’Estudis Occitans (IEO). En defòra d’aquò es traductor, lexicografe, redactor, cronicaire e conferencièr ocasional, amb totjorn dins sos diferents trabalhs un rapòrt amb la lenga o la cultura occitana. S’interèssa als ligams entre las lengas minoritàrias e las culturas popularas mondialas e contemporanèas, especialament al videojòc e als univèrs de ficcion, e mena de recèrcas sus aqueles tèmas.

En junh de 2023 pareguet Dordogne, un juec vidèo independent emb mai d’una particularitat, a començar per quela d’èsser lo prumier a surtir oficialament, e dins lo monde entier, en occitan. Coma es-quò possible ? Dins aquela presentacion, tornarem far l’istoric de quel projèct, de las envejas prumieras deus desvelopaires a l’espelison finala ; nos interessarem al contèxte del juec vidèo en França e dins lo monde e a las oportunitats que vesèm aura se drubir per las lengas minoritàrias emb quel important ben cultural ; e segur parlarem de las especificitats del trabalh de traduccion e de localizacion en occitan, entre tèxtes, votz e referéncias culturalas mai o mens rescondudas. Mai benlèu jugarem !

Comments