DUOC 2022 : romans occitans e comptes païsans

JOAN BODON E FERRAN DELÈRIS CONTAN LA TÈRRA : QUALQUES ROMANS OCCITANS

dimecres 23/03 a 18h30

Catherine Parayre, Professora associada a l’Universitat Brock dins la Region de Niagara al Canadà, Catherine Parayre dirigís lo Centre d’Estudis en arts e culturas e lo Centre de Recèrcas en arts interdisciplinàrias e creacion culturala, los dos restacats a l’Escòla de las bèlas arts e de las arts de l’espectacle Marilyn I. Walker. Es cofondatora e codirectritz de la Small Walker Press e directritz de Voix plurielles, revista de l’Associacion dels / de las professor.a.s de francés de las universitats e collègis canadencs.

Joan Bodon (1920-1975) e Ferran Delèris (1922-2009) apartenon a la meteissa generacion e a la meteissa tèrra de Roèrgue. Lors romans occitans tematizan la ruralitat e lo sòrt de personatges confrontats a la guèrra e a de prigondas transformacions sòcioeconomicas. Descrivon un mond en perdicion e d’èssers preses dins de questions existencialas que lor cal resòlver. Aquestes romans d’un luòc son, mai que mai, de romans sus la condicion umana, la de la pensada e la, que li es cavilhada, del trabalh.

 

LOS PAÏSANS TANBEN SABON COMPTAR ! L’EXTRAORDINARI LIBRE DE COMPTE D’UNA FAMILHA DE PAÏSANS CARCINÒLS DE LA FIN DE L’EDAT MEJANA

dimecres 13/04 a 18h30

Florent Hautefeuille, Professor d’arqueologia medievala a l’Universitat Tolosa Joan Jaurés, Florent Hautefeuille a un percors mixte d’istorian e d’arqueològ. Dirigiguèt un quinzenat d’operacions d’escavament e de prospeccion, particularament dins lo sud de Carcin e lo nòrd tolosan. En parallèl a sos trabalhs de recèrca, mena de trabalhs dins l’edicion de sorgas.

En 1990, a l’escasença de trabalhs dins los vestigis de çò qu’èra agut estat una glèisa parroquiala del sud d’Òlt, se descobriguèt un pichon libròt de papièr. L’azard, l’interès de l’artesan que faguèt la trobalha, lo suènh del proprietari, an permés de preservar aquel document excepcional. Sa lectura, entrepachada per la conservacion, la grafia e la lenga a permés d’identificar çò que demòra a l’ora d’ara lo document d’aqueste tipe mai ancian que se conesca en França. S’agís d’un document ibrid entre libre de compte e memòria familiala qu’apartenguèt a una pichona familha, saique d’origina sèrva, los Guitard. Al delà del caractèr excepcional de la descobèrta, aqueste document permet de penetrar dins la sociabilitat d’un linhatge de simples païsans. Dobrís tanben de pistas sus l’occitan carcinòl de la fin de l’Edat Mejana, estant qu’una part de las notícias que conten lo document son escrichas en occitan. La presentacion permetrà d’abordar los diferents apòrts istorics d’aquel document excepcional.

Voir le programme en français

Comments

comments